काठमाडौं । नेपाल सुपर लिग (एनएसएल)को दोस्रो संस्करणमा चितवन एफसीले वीरगन्ज युनाइटेड एफसीविरुद्ध २–१ को रोमाञ्चक जित निकालेको छ ।

एनएसएलको दोस्रो संस्करण चलिरहँदा प्रतियोगिताको इतिहामै चितवनको यो पहिलो जित हो । पहिलो संस्करणमा ६ खेल खेल्दा पनि चितवनले जित निकाल्न सकेको थिएन । पहिलो संस्करणमा ६ खेलमध्ये चार खेलमा हार बेहोरेको चितवनले दुई खेलमा बराबरीको नतिजा निकालेको थियो ।

शुक्रबार त्रिपुरेश्वरस्थित दशरथ रंगशालामा सम्पन्न खेलमा चितवनलाई जत दिलाउन विमल घर्तिमगर र टोरिक जेब्रिनले गोल गरे । वीरगन्जका आइकिन्स बाफोरले एक गोल फर्काएका थिए ।

खेलको २८औँ विमलले गोल गर्दै चितवनलाई अग्रतामा राखेका थिए । मध्यभागबाट रोशन रानामगर निकालेको उत्कृष्ट ‘थ्रू’ बललाई नियन्त्रणमा लिँदै विमलले ‘वान भर्सेस वान’ मा वीरगन्जका गोलकिपर दीप कार्कीलाई बिट गरी खाली पोस्टमा गोल गरे ।