वासिङ्टन डिसी । चर्चित पप समूह ज्याक्सन फाइभका सदस्य रहेका टिटो ज्याक्सनको ७० वर्षको उमेरमा निधन भएको छ । टिटो ज्याक्सन परिवारको तेस्रो सन्तान थिए । यस परिवारमा चर्चित सुपरस्टार माइकल ज्याक्सन र ज्यानेट ज्याक्सन पनि रहेका थिए । टिटोका छोराहरू टीजे, ताज र टारयलले आइतबार राति इन्स्टाग्राममा एउटा वक्तव्य पोस्ट गर्दै उनको निधनको जानकारी दिएका थिए । ‘हामी उहाँको निधनबाट स्तब्ध, दुःखी र भावविह्वल भएका छौँ,’ वक्तव्यमा भनिएको छ । ज्याक्सन फाइभमा टिटोसहित ज्याकी, जर्माइन, मार्लोन र माइकल रहेका थिए ।
परिवारको यो समूहलाई सन् १९९७ मा रक एन्ड रोल हल अफ फेममा समावेश गरिएको थियो । १९७० को दशकमा जारी गरिएको समूहका ‘एबीसी’, आई वान्ट यू ब्याक र आई विल बी देयर’ लगायत गीतहरू अझै पनि रुचाइन्छ । सन् १९५३ अक्टोबर १५ मा जन्मिएका टोरियानो एडारिल ‘टिटो’ ज्याक्सन समूहका ब्याकग्राउन्ड गायक थिए र गितार पनि बजाउँथे । पछि उनका दाजुभाइहरूले एकल करियर सुरुवात गरेका थिए । जसमध्ये माइकल विश्वभर ‘किङ अफ पप’ भनेर चिनिए । माइकलको सन् २००९ जुन २५ मा ५० वर्षको उमेरमा निधन भयो ।
